WAKILI AJITOA KESI YA SHEIKH PONDA

WAKILI wa upande wa utetezi katika kesi ya wafuasi 54 wa Katibu wa Jumuiya na Taasisi za Kiislam, Sheikh Issa Ponda, Hamidu Ubaidi ametangaza kujitoa kuendelea kuwatetea washitakiwa hao kwa kile alichodai kuwa kesi hiyo imekuwa ikiendeshwa haraka na mfululizo na mahakama.

Kesi hiyo ambayo ilikuja kwa ajili ya kusikilizwa, wakati mshitakiwa wa 24 anatoa utetezi wake, wakili Ubaidi mbele ya hakimu Sundi Fimbo aliomba kesi hiyo isiendelee kusikilizwa kwa sababu yeye anawasilisha ombi rasmi la kujitoa.

“Naona sitawatendea haki washitakiwa ambao ni wateja wangu  kulingana na kesi hiyo ya maandamano haramu ya kutaka kwenda ofisi ya Mkurugenzi wa Mashitaka (DPP), Dk Eliezer Feleshi ili wamshinikize aondoe hati yake ya kumfungia dhamana Ponda, kwa sababu kesi hii inavyokwenda haraka na mfululizo sipati muda wa kuzungumza na kuwaandaa washitakiwa,” alidai wakili Ubaidi.

Hata hivyo ombi hilo lililamikiwa na mawakili waandamizi wa Serikali Benard Kongora, Joseph Mahugo kwa madai hiyo ni mbinu ya kuichelewesha kesi hiyo:

“Mhesimiwa hakimu ni huyu huyu wakili Ubaidi, Jumatatu  na Jumatano aliomba kesi hii tuairishe mara kwa lisaa limoja lakini hakutokea …leo hii anakuja kuieleza mahakama kuwa eti anajitoa kuwatetea washitakiwa kwasababu kesi hii inaendeshwa mfululizo na hapati muda wa kuwaandaa washitakiwa wake…. sisi upande wa Jamhuri tunasema hii ni mbinu ya kutaka kuchelewesha kesi hii isimalizike mapema. Ni uongozi wa mahakama ndiyo uliotoa fursa ya kesi hii kuendeshwa mfululizo hivyo sisi tunaona tutumie fursa hiyo kuendesha kesi hii,” alidai wakili Kongora.

Kwa upande wake hakimu Sundi Fimbo aliarisha kesi hiyo hadi Machi 11 mwaka huu, itakapokuja kwa ajili ya washitakiwa kuendelea kujitetea.

Wakati huo huo; Jumla ya washitakiwa tisa wa kesi ya uchochezi na wizi wa malighafi zenye thamani ya Sh. Milioni 59 inayomkabili Ponda na wenzake 49, wamedai hawamfahamu Shekhe Mkuu wa Tanzania, Mufti Issa bin Shaban Simba wala Baraza la Waislamu Tanzania (BAKWATA).

Pia waliyakana maelezo waliyoyatoa wakati wakihojiwa na Jeshi la Polisi ambapo walikuwa wamekiri kuwa walikamatwa katika eneo la kiwanja cha Markas Chang’ombe kinachomilikiwa na kampuni ya Agritanza Ltd., lakini leo wakati wakitoa utetetezi wao walikanusha kukamatwa eneo hilo na kwamba wao walikamatwa na polisi Oktoba 16 mwaka jana, wakiwa ndani ya Msikiti wa shule ya Markas Chang’ombe wakisali sala ya Itikaf.

Washitakiwa hao ambao walikuwa wakiongozwa na wakili wao Nassor Juma, ni mshitakiwa 10,11,12,13,14,15,16 na 17.

Wakihojiwa na wakili Mwandamizi wa serikali Tumaini Kweka ni kwa nini walipopanda kizimbani wametoa maelezo mapya wakati walipohojiwa na polisi walitoa maelezo ya kikiri kukamatwa ndani ya kiwanja hicho ambacho kiliuzwa na BAKWATA kwa kampuni ya Agritanza Ltd., washitakiwa hao wakijibu swali hilo wengine walidai hawajui kusoma na kuandika na wengine wakadai kuwa hayo maelezo ni yao na saini ni zao ila hizo saini waliziweka kwenye hayo maelezo baada ya kulazimishwa na askari polisi. Wengine walidai kuwa hawakufahamu ni kitu gani kilikuwa kikiandikwa na polisi waliokuwa wakiwahoji kwa sababu polisi hawakuwasomea maelezo hayo. Mshitakiwa mwingine alidai maelezo aliyochukuliwa na askari yaliandikwa na wino wa blue na siyo mweusi kama alivyoonyeshwa leo nakala ya maelezo yake ambayo yapo mahakamani kama kielelezo na wakili Kweka.

Aidha, kwa ujumla wao washitakiwa hao walidai kuwa polisi waliwafanyia unyama, waliwapora simu zao za mikononi, waliwatukana matusi ya nguoni na waliwapiga virungu. Wkasema baadhi ya Askari Polisi waliokuwa wamekuja kuwakamata ndani ya Msikiti walikuwa wananuka pombe na hawakuvua viatu wakati wanaingia ndani ya msikiti.

Viongozi wa Jumuiya hiyo, Sheikh Ponda ambaye ni mshitakiwa wa kwanza na Swalehe Mukadam, walikwepa kuanza kutoa utetezi wao, baada ya Wakili Juma Nassoro, kudai kuwa wataanza na washitakiwa wengine.