Sauti yangu mikono yangu haikuweza kumuokoa Mwangosi

Na Abdallah Khamis

NENDA Mwangosi nenda si kama nimekudharau kwa muda wote kukaa kimya

juu ya madhila yaliyokukuta hapana Daudi ningali ninaisikia sauti yako

ikiwaeleza maaskari wale katili kuwa wewe si muhalifu ni mwandishi wa

habari unayetimiza majukuimu yako.

Inanijia picha yako kila mara ninapotaka kuandika kuhusiana na wewe

Daudi, namna ulivyokuwa ukijitahidi kuinuka katika kundi la watesi

wako huku ukiishiwa nguvu hata kufikia kushindwa kusimama baada ya

kipigo cha marungu teke na ngumi zilizokuwa zikikufikia.

Machozi yananitoka Daudi si kwa sababu umekufa tu bali umekufa kinyama

mbele ya kamanda wa Polisi mkoani Iringa,  hukustahili kifo kile na

hata sauti yangu haikuweza kuwazindua madhalimu wale waliokuwa

wakikugombania mithili ya Mwizi, mnyang’anyi au dudu lisisloastahili

kuonekana katika uso wa Dunia.

Wamekuuwa Daudi ukitimiza majukumu yako ya kutaka kuwahabarisha

watanzania juu ya kile kilichokuwa kinaendelea katika kijiji cha

Nyololo kwa kuwa kamera yako ilibeb vitu vingi vilivyokuwa vinaendelea

pale ikiwa ni pamoja na namna walivyokuwa wakimimina mabomu ya Machozi

katika jingo la ofisi ya Chadema

Kaka yangu Daudi huenda kazi yako hiyo iliwatisha zaidi Polisi baada

ya kuona wanachokifanya hakiendani na dhamira halisi ya kutuliza

ghasia kwa kuwa sasa walihamishia machungu yao katika jengo ambalo

sina hakika kama lilikuwa na watu ndani au la.

Kwa sababu ulitaka kuonyesha upuuzi wao huo ndiyo maana hata kamanda

wa Polisi Michael Kamuhanda nilipomwambia akusaidie wasiendelee

kukudhuru hakuthubutu kuinua  mkono au kupaza sauti yake kukuhami ili

kuonyesha thamani yako kwake, na hii inanifanya niamini ni kutokana na

maswali mazito uliyokuwa ukimuuliza kuanzia asubuhi na hata pale

katika eneo la tukio kabla ya mauti hayajakufika.

Kwanini Daudi uliuliza maswali ya msingi kutaka kujua maana ya kikao

cha ndani kama ni lazima watu wakae ndani ya jengo ama ni kile

kinachowahusisha wanachama peke yao, ambayo dhahiri yalimkera Rpc

Kamuhanda hadi akakuangalia kwa chuki na kukueleza “inaonekana

hujashiba majibu yangu ya tokea asubuhi eeh”aahh Mwangosi tulicheka

pamoja juu ya maelezo ya majibu ya Kamuhanda kumbe sikujua kuwa ndiyo

kicheko chako cha mwisho hapa duniani.

Daudi ni wewe uliyemwambia Kamuhanda kuwa waandishi wanataka

kujiridhisha na hali halisi ili wasipotoshe pale alipokerwa na

Mawswali ya Mwandishi Renatus Mutabuzi hata Kamanda huyo akafikia

kumwambia wewe kijana ninakufahamu.

Hukukaa kimya Mwangosi wakati RPC Kamuhanda alipokuwa akilalamika kuwa

mimi  tokea asubuhi ya septemba 2 katika ukumbi wa mikutano ya jengo

la Polisi mkoani Iringa nilikuwa nikimuuliza maswali aliyotafsiri kuwa

ni tofauti na muono wake “Negative”.

Mwangosi tumshukuru mungu hakutupa nguvu ya kubaini yatakayotokea

mbele yetu vinginevyo tungeweza kubaini kuwa yale malalamiko ya RPC ni

maagizo kwa vijana wake kuwa tunamkera hivyo ni lazima waandishi

washughulikiwe.

Kama tungeweza kubaini yajayo juu ya maisha yetu Mwangosi basi

tusingewasogelea wale amabo mimi ninaamini kuwa ndiyo wauaji wako hata

kama wengine watakuja na tafsiri tofauti juu ya hilo.

Mwangosi umeenda na juzi wamekulaza katika eneo la Itete huko Tukuyu,

ninachoweza kushuhudia kauli yako sasa ni kwamba hukuogopa kifo bali

uliogopa kuishi milele.

Mwangosi ni wewe asubuhi ya Septemba 2 wakati tukitaniana na baadhi ya

askari waliovaa kiraia tulipokuwa tunatoka katika mkutano kwa RPC wa

Iringa uliwaambia huogopi kufa kwa kuwa hiyo ni ada ya kila mwanadamu

na kwamba utaogopa ikiwa utaambiwa utaishi milele, sasa umenifahamisha

kuwa ulikuwa ukiishi vile ulivyosema.

Daudi wasio kuwepo katika eneo la tukio wamekuja na kauli zao za ajabu

kuwa mara ulikuwa umejifunga bomu mara umerushiwa kitu kizito kutoka

kwa wafuasi wa Chadema na hata sasa wakati umelala katika nyumba yako

ya Milele tayari kuna tume imeundwa kuchunguza njia iliyotumika

kukufikisha wewe katika makazi ya Milele.

Najua kuna uwezekano wakaja na majibu tofauti ambayo yatakuwa

yameandikwa katika makaratasi na kuita ripoti ya uchunguzi, naomba

nikuhakikishie sitokusaliti sasa na hata kesho katika kuufahamisha

umma kuwa ulilipuliwa na kitu kilichotoka katika mtutu wa bunduki

ulielekezwa kwako na mmoja wa askari waliokuzunguka hata baadhi ya

nyama ya mwili wako kurukia katika nguo zangu.

Sisemi hivi kwa kuhadithiwa Daudi niliyashuhudia mateso yako na hata

sauti yangu na mikono yangu iliyokuwa ikigonga gari la mkuu wa Polisi

mkoani Iringa nikitaka wakusaidie  vitakuwa shahidi siku

nitakayokusaliti.

Mwisho