MWAKYEMBE ABADILISHA BODI YA BANDARI

 WAZIRI wa Uchukuzi, Harrison Mwakyembe ameifuta  Bodi ya Wakurugenzi wa  Mamlaka ya Usimamizi wa Bandari (TPA), na kuteua wajumbe wengine wanane watakaounda Bodi hiyo kuanzia juzi Navemba 6 mwaka huu.

 

Kwa mujibu wa taarifa ya Mwakyembe iliyosambazwa kwnye vyombo vya habari jijini Dar es Salaam jana, alichukua  uamuzi huo kutoakana na mamlaka aliyonayo chini ya Kifungu cha 6(2) cha Sheria ya Bandari na Kifungu cha 1(2)(i) cha Sheria ya Bandari ya mwaka 2004.

 

Tarifa hiyo iliwataja wajumbe wa Bodi iliyovunjwa kuwa ni pamoja na Dunstan Mrutu, Injinia George Alliy, Alh. Mtutura Mtutura, Emmanuel Mallya, Mwantum Malale na Maria Kejo.

 

Ikifafanua zaidi taarifa hiyo,  ilisema kwa bahati mbaya  wajumbe wawili wa Bodi hiyo iliyofutwa wamefariki dunia bila kuwataja majina hivi karibuni.

 

Wajumbe waliyoteuliwa kuingia kwenye Bodi hiyo mpya kuwa ni pamoja na Dk Jabiri Bakari, John Ulanga, Caroline Temu, Jaffer Machano, Dk Hizldebrand Shayo, Saidi Sauko, Injinia Julius Mamiro na Asha Nassoro.

 

Taarifa hiyo ilieza kuwa mabadiliko hayo ni sehemu tu ya hatua ambazo Wizara inachukua kurejesha ufanisi katika Mamlaka hiyo ili iweze kuchangia zaidi kwenye pato la Taifa.

 

Waziri aliagiza menejimenti ya TPA kuwapa nyaraka zote muhimu Wajumbe wapya wa Bodi ili waweze kujiandaa kabla hajakutana nao ndani ya siku kumi kuanzia juzi ili kuingia nao Mkataba wa ufanisi.