Wananchi Waiadhibu CCM Mafuta

Na Bryceson Mathias, Mhonda Mvomero

WANANCHI wa Mafuta Kata ya Mhonda Wilaya ya Mvomero mkoani Morogoro, bado wameshikilia Msimamo wao wa kuiadhibu Chama cha Mapinduzi (CCM) kwa kuendelea kumpigia Kura Nicholous Mbelwa kuwa Mwenyekiti wa Serikali ya Kijiji chao hata kama atakuwa  Gerezani.

Hayo yalisemwa na baadhi ya wanakijiji waliohojiwa kwa nyakati tofauti karibuni, wakipinga unyanyasaji wa Mtendaji Kata Emili Mjenja ambaye alifutilia mbali uamuzi wa wananchi wa kumchagua Mbelwa wa Chama cha Demokrasia na Maendeleo (Chadema) kuwa Mwenyekiti, badala ya Waziri Juma (CCM).

Mapema Julai, 2012 wananchi wa Mafuta walimkataa na kumtosa aliyekuwa Mwenyekiti wao Juma kutokana na tuhuma za Ubadhirifu wa Fedha za michango ya Mradi wa Zahanati ambao sasa umetelekezwa na hivyo kupingwa na wananchi kuwa michango yao inachakachuliwa Ki-Itikadi.

Mjumbe wa Halmashauri ya Kijiji Jafari Seleman alikiri kuwepo mgongano wa kimaslahi kati ya baadhi ya Viongozi wa Kata na wale wa kijiji dhidi ya wananchi, ambapo alisema kumekuwa hakuna Ueledi katika taarifa za Mapato na matumizi ya Michango, na kusababisha migogoro.

Kwa upande wake Mwenyekiti wa Mbelwa aliyechaguliwa na wananchi baada ya kuangushwa   Juma aliwalaum viongozi wa Kata akiwatuhumu kuwa wanafanya mchezo na Masha ya Wananchi ambao wanateseka kuokoa nguvu na Juhudi za Serikali.

Diwani wa Kata ya Mhonda Salum Mzugi (CCM) alipoongea na mwandishi wa habari hizi alisema, anasikitishwa kuwepo kwa migogoro ya mara kwa mara inayohusu upinzani wa vyama kwa sababu inawacheleweshea wananchi maendeleo waliyokusudia.

Aidha kumekuwepo na malalamiko ya kiasi cha Jumla ya Shilingi Laki 125, 000/- ambapo Sh. 80,000/- Elfu zikiwa ni gharama za Matofali 800 (kila moja Sh. 100/-), Sh. 45,000/- michango ya wanakijiji kilichowapelekea Mafuta kumuengua Uenyekiti wa Serikali Juma toka Julai, 2012.