KAMPUNI YA CHINA KUJENGA BANDARI YA BAGAMOYO

Tanzania imeingia makubaliano na Kampuni ya Ujenzi(Merchants Holding Company), kutoka China kwa ajili ya ujenzi wa Bandari Mpya ya Bagamoyo mkoani Pwani.

 

Akizungumza na wandishi wa habari jijini Dar es Salaam jana, WAZIRI wa Nchi, Ofisi ya Waziri Mkuu Uwekezaji na Uwezeshaji, Mary Nagu, alisema makubaliano ya awali yalifanyika Septemba 5 mwaka huu.

 Alisema ujenzi huo unaenda sambamba na uendelezaji wa miradi mingine inayoambatana na ujenzi wa bandari hiyo kwenye Eneo Maalumu la kiuchumi la Bagamoyo (SEZ),

 

“Leo tunashuhudia uzinduzi rasmi wa kikosi kazi cha pamoja kati ya serikali ya Tanzania na Kampuni ya China Merchants Holding Company kitakachosimamia utekelezaji wa mradi huu”alisema Dk Nagu.

 

Dk Nagu alisema kikosi kazi hicho kilichozinduliwa kitasimamia miradi itakayojumuisha ujenzi wa barabara itakayounganisha bandari hiyo, mtandao wa barabara nyingine pamoja na ujenzi wa Reli itakayounganisha bandari hiyo na Reli ya kati na TAZARA.

 

Alibainisha kuwa miradi hiyo itatekelezwa kwenye maeneo hayo maalu ya kiuchumi(Bagamoyo SEZ), hivyo huo ni mradi wenye umuhimu mkubwa kwa maendeleo ya Taifa ikizingatiwa kwamba bandari hiyo mpya itasaidia kupunguza msongamano wa mizigo kwenye Bandari ya Dar es Salaam ambayo tayari imekaribia ukomo wake wa kupanuliwa.

 

Akifafanua zaidi, Dk Nagu alisema jukumu hilo, linatokana na kulingana kwa Kaulimbiu ya Mkutano wa Tano wa Mawaziri wa Nchi 50 za Kiafrika.

 

“Jukwa hilo linaitwa ushirikiano wan chi za Afrika na China (FOCAC), ambalo ndiyo chimbuko la mradi huu”alisema Dk Nagu.

 

Aliongeza kuwa mradi mpya utakuza kwa kiasi kikubwa ushindani wa Tanzania Kikanda na Kimataifa kwa kuzingatia kwamba itaongeza uwezo wa kuhudumia shehena za mizigo kutoka na kwenda nchi jirani za Uganda, Rwanda, Burundi, Zambia, Congo (DRC), na Malawi.

 

Pia itaongeza mapato yatokanayo na biashara ya kimataifa na kuongeza fursa za ajira hivyo kuchangia kwa kiasi kikubwa kuongeza kasi ya kukua kwa uchumi wa nchi.